إيه حكاية الـ4 تريليون دولار اللي عليهم خناقة في المنطقة وايه نصيب مصر فيهم وليه فيه صراع شرس من شركات ادارة الاصول المالية في العالم على منطقة الشرق الاوسط وازاي مصر قدرت تسجل جون في الصراع الحامي دا.. كل التفاصيل في الفيديدو دا خليكم معانا للأخر..
في الأسواق الدولية فيه شركات اسمها شركات إدارة الأصول المالية ودي باختصار شركات بتشغل ثروات وفوائض أموال الدول والصناديق السياسية في كل أنحاء العالم وبتدخلها في مشاريع عشان تكبرها وبتشتغل في تريليونات الدولارات حولين العالم.
وأغلب شركات إدارة الاصول الشهيرة في العالم زي أبولو وبلاكسون وبلاك روك بتشتغل في امريكا واسيا واوروبا لكن دلوقتي فيه صراع بين الشركات دي على تريليونات الشرق الأوسط وحسب تقرير حديث بدأت الشركات دي في إعادة تشكيل استراتيجياتها التقليدية طويلة الأمد لاقتناص جزء من ثروة الصناديق السيادية الخليجية اللي بتدير أصول بقيمة 4 تريليونات دولار
طيب بالراحة كده ايه هي الصناديق السيادية الخليجية وجابت الفلوس دي كلها منين؟
شوف حضرتك الصناديق السيادية دي اخترعتها دول الخليج عشان تستثمر الفائض المالي الضخم في ايرادتها المالية من مجال تصدير النفط وقالت بدل ما احطه في الاحتاطي ولا البنوك انا هشغله في مشروعات عالمية واقليمية بحيث قيمته تزيد من الارباح وفي نفس الوقت بمثاية ثروة للأجيال الجاية..
نرجع لموضوعنا وعشان تعرف الموضوع كبير قد إيه التقديرات بتقول إن إجمالي أصول صناديق الثروة السيادية في الشرق الأوسط هيوصل إلى 7.6 تريليون دولار بحلول 2030، واغلبه في دول الخليج العربي الغنية بالبترول وبالتالي ده لفت انتباه حيتان إدارة الأصول في العالم واللي عاوزين جزء كبير من تورتة الاستثمارات بتاعة الصناديق السيادية الخليجية وحصل زي حرب وصراع بين الشركات العالمية دي للفوز بأكبر حصة من أرباح الصفقات، والأهم من ذلك دعم الاقتصادات التي تعتمد بشكل كبير على توافر كميات كبيرة من النفط.
ووصل الأمر إن شركات إدارة الاصول في العالم نقلت مكاتبها لدول الخليج عشان تكون قريبة من الصناديق السيادية وتقدر تتعامل وتتواصل مع المسئولين لاقناعهم بالحصول على مليارات الدولارات لتشغيلها حولين العالم والموضوع كبر وبقي فيه عروض بتقدمها الشركات دي لقادة الصناديق السيادية الخليجية عشان كل شركة تفوز بالنصيب الاكبر.
طيب ايه علاقة مصر بالتريليونات دي وشركات ادارة اصول العالمية؟
إزاي بقي.. مصر في القلب من الموضوع دا لأنها نجحت في جذب اهتمام الصناديق السيادية في الخليج للاستثمار في مصر سواء من خلال برنامج الطروحات الحكومية وشفنا أكتر من صفقة ضخمة راحت لصالح صناديق خليجية وودا غير صفقة رأس الحكمة مع الامارات واللي هتوصل استثماراتها الاجمالية 150 مليار دولار وغير مشروعات الصناديق الاماراتية والسعوديةالتانية في مصر زي المناطق الصناعية ومحطات الطاقة ومشروعات الهيدروجين الاخضر وغيرها يعني بنتكلم في استثمارات خليجية بمليارات الدولارات في مصر وأكيد الحكومة المصرية عاوزة تضاعف الاستثمارات دي في مجالات كتير وإن يكون ليها نصيب أكبر في استثمارات الصناديق السيادية في الخليج ودا بيخدم الامن القومي العربي كله وبيزيد التعاون وفي نفي الوقت مصر بقت سوق مثالي للاستثمار والارباح.
.
ملحوظة: مضمون هذا الخبر تم كتابته بواسطة بوابة بانكير ولا يعبر عن وجهة نظر موقع المربع وإنما تم نقله بمحتواه كما هو من بوابة بانكير ونحن غير مسئولين عن محتوى الخبر والعهدة علي المصدر السابق ذكرة.
التعليقات