عشان مايضحكش عليك.. إزاى تشتري عقار وفي نفس الوقت تحقق أقصى ربح – المربع

يا ترى لو معاك فلوس وعاوز تستثمرها في عقار تعمل إيه، يعني لو ناوي تشتري شقة من غير ما يضحك عليك، إزاي تستثمر فيها فلوسك وتحقق منها أعلى ربح.. هنقولك كل التفاصيل في التقرير  ده. 
 

“العقار… ابنك البار”.. الكلمة دي  شائعة جدا في الأوساط الاقتصادية، ومعناها إن شراء العقارات أو الاستثمار فيها مربح جدا، وبيعتبر ملاذ آمن لأي حد معاه فلوس وعاوز يشغلها أو يستثمرها، لأن العقار أو الشقة لا بياكل ولا بيشرب ولا بيحتاج مصاريف تشغيل.

وفعليا، في ناس بتشتري وحدة سكنية للسكن أو الإقامة أو التأجير وكمان ممكن تكون استثمار.

ومن هنا، حضرتك ممكن تشتري عقار وتأجره وبكده تقدر تستفيد منه على المدى القريب، وكمان مع الوقت سعره بيغلى وده بيعتبر استثمار بعيد المدى، يعني لما تيجي تبيعه بعد سنة واحدة، هيجيب حقه مرتين وده أقل حاجة.

عشان كده، هنقدملك شوية نصايح مهمة جدا لو ناوي تشتري عقار أو تستثمر فيه، والنصايح دي بتعتبر أكثر  فعالية لأنها بتضمن لحضرتك أنك تحقق ربح عالي من الاستثمار في العقارات في نفس الوقت.

أول حاجة موقع العقار أو الشقة اللي هتشتريها، ويفضل انك تختار موقع استراتيجي بس لازم يكون ضمن حدود ميزانيتك.

تاني حاجة، توقيت شراء العقار، لازم تختار التوقيت الأمثل لشراء وحدة عقارية بالنسبة ليك، وعشان تحدد أفضل وقت، لازم تتابع نشاط سوق العقارات على طول، مع الإلمام بآخر التطورات والقوانين المتعلقة به.

ونقدر نقولك، إن توقيت بدء العام الدراسي من أفضل الأوقات لشراء العقار، لأن وقته بينخفض الإقبال والطلب وبالتالي بتنخفض  الأسعار مقارنة بأي وقت تاني.

ماتنساش قبل ما تشتري، انك تشوف فحص سلامة التراخيص، وتتأكد إن مافيش ديون مستحقة على الوحدة بتاعتك اللى ناوي تشتريها.

نصيحة كمان، إياك تنخدع بانخفاض سعر العقار وإيادك تندفع  للشراء قبل ما تتأكد من ملكية البائع للعقار، وكمان تشوف بنفسك أوراق الملكية وتسجيلها كمان بالشهر العقاري.

لازم كمان، تتأكد إن الوحدة العقارية اللي هتشتريها في عمارة مرخصة، سواء كانت للأرض أو المباني، عشان تقدر تتفادى شراء عقار فيه عيوب أو عليه نزاعات ممكن تعرضك لمشاكل بعد الشراء.

حاجة كمان مهمة لازم تاخد بالك منها، وهي توافر الخدمات والمرافق في الشقة، وتتأكد إن الخدمات والمرافق بتاعتها متناسبة مع تكلفة الشقة كمان، بالإضافة إلى أن رسومها متوافقة مع السعر.

لازم كمان تراجع المصروفات، زي الصيانة الدورية والإصلاحات ومصاريف التأمين، وخلافه.

طب مساحة الشقة تتأكد منها إزاي، لازم حضرتك تتأكد من المساحة في عقد الملكية، وتتأكد كمان من مطابقتها للسعر المتفق عليه والمكتوب في العقد، وضروري جدا تراجع مدى ملاءمة المساحة لاحتياجاتك اللي خليتك تشتري الشقة أو العقار.

وفي شوية بيانات تفصيلية كده لازم حضرتك تتطلع عليها، زي تراخيص المباني للمكان أو الحي الموجود فيه الشقة وأنه صادر من جهة مختصة ولا لأ، وكمان عدد الأدوار المرخص بها، عشان شقتك ماتتعرضش للإزالة، ومهم جدا بيانات شركات الكهرباء والمياه والغاز والسنترال، عشان تتأكد  أن صاحب الوحدة بالفعل متعاقد على تلك الخدمات ولا لأ، أو أنه سدد قيمتها لحد آخر موعد قبل شرائك الشقة.

وماتنساش تراجع المعلومات دي قبل إمضاء العقد، زي اسم المشتري والبائع كامل، ورقم البطاقة، ويفضل حصول كل طرف علي صورة بطاقة الآخر، وعنوان محل الإقامة كامل للبائع، وكمان بيان تفصيلي بالمبيع (سواء شقة – أرض فضاء – محل – عقار كامل).

ضيف على كل ده، بيان الثمن وازاي تدفعه بشكل صحيح، وكمان وجود بند في العقد بأن المالك يضمن علاج أي عيوب فنية لو ظهرت، وأخيرا التأكد من أن شراء العقار تم بمستند ملكية صحيح.

كل ده مهم جدا، عشان مايضحكش عليك، فخلي بالك.