ايه حكاية الاستثمارات الهندية الضخمة والجديدة في مصر وإيه علاقتها بالصين وازاي مصر بقت سوق بيتنافس عليها الدول والمستثمرين وإيه المشروعات الاستراتيجية اللي هتعملها الهند في مصر.. تابعونا للأخر هتلاقو التفاصيل في التقرير التالي.
العلاقات المصرية الهندية علاقات قديمة جدا وقوية وتقدر تقول كده في وقت من الاوقات كان فيه تحالف هندي مصري يوغسلافي في الستينات والتجربة الهندية في الصناعة والنهوض الاقتصادي بدأت مع مصر لكن هي قدرت تنطلق لكن الحروب عطلت التجربة المصرية والتاريخ دا بيلعب دور كبير في تعزيز التعاون بين البلدين..
على مستوى الاستثمارات فيه مشروعات هندية في مصر ب4 مليار دولار تقريبا وفيه محادثات واعدة لعمل مصانع هندية في منطقة اقتصادية قناة السويس وفعلا تم الاتفاق عليها وتقدر تقول كده فيه منافسة صينية هندية على السوق المصري بسبب الامتيازات الكبيرة فيه وقربه من خطوط التجارة الدولية والاسواق الدولية وانخفاض قيمة العملة المحلية وقوة وحداثة البنية الاساسية اللي عملتها مصر بخلاف الاستقرار والقرب الحضاري بين مصر والدولتين اللي فيهم أكبر سوقين في العالم من حيث عدد السكان.
وبالأرقام تمثل الاستثمارات الهندية والصينية حوالي 45% من إجمالي تعاقدات المنطقة الاقتصادية لقناة السويس في الفترة الأخيرة، وده كلام رئيس مجلس إدارة الهيئة العامة للمنطقة الاقتصادية، وليد جمال الدين.
وعلى سبيل المثال منطقة تيدا – مصر الصناعية التي تمثل التعاون الاقتصادي المصري الصيني والتي وصلت إلى وجود 160 شركة بإجمالي استثمارات 2 مليار دولار.
طيب ايه الجديد في الاستثمارات الهندية في مصر؟
دلوقتي شركة تى سي آي سانمار الهندية للكيماويات ودي شركة عملاقة وعالمية بتخطط لإنشاء محطة جديدة لاستقبال ونقل الايثيلين بميناء غرب بورسعيد بإجمالي استثمارات 150 مليون دولار، ده بخلاف التوسع في طاقة مصانع الشركة ببورسعيد لمصنعي إنتاج VCM وPVC بقيمة 150 مليون دولار ليبلغ الاستثمارات الكلية المخططة 300 مليون دولار.. وده رقم مش قليل في عالم الاستثمارات .
والنهاردة كامل الوزير وزير الصناعة والنقل قابل رئيس الشركة الهندية للكيماويات، لبحث فرص الاستثمار بالسوق المصري، والمشروعات المستقبلية للشركة خلال المرحلة المقبلة.. وأكدت إدارة الشركة زيادة استثماراتها في السوق المصري باعتباره سوق محوري في منطقة الشرق الأوسط ونافذه هامة الي دول العالم.
مش كده وبس دا كمان الشركة أكدت اهتمامها للاستفادة من المقومات الاستثمارية الكبيرة للسوق المصري، واللي بتشمل التسهيلات والبنية الأساسية المتاحة في مصر، وخاصة في غرب ميناء بورسعيد.
وعلى فكرة شركة تي سي آي سانمار للكيماويات من أكبر الاستثمارات الهندية العاملة بالسوق المصري بحجم استثمارات بيوصل 1.5 مليار دولار، كمان تعتبر الشركة من أكبر منتجي مادة البولي فينيل كلورايد في منطقة الشرق الأوسط وشمال إفريقيا وتوفر نحو 3000 فرصة عمل مباشرة وغير مباشرة للشباب.
ملحوظة: مضمون هذا الخبر تم كتابته بواسطة بوابة بانكير ولا يعبر عن وجهة نظر موقع المربع وإنما تم نقله بمحتواه كما هو من بوابة بانكير ونحن غير مسئولين عن محتوى الخبر والعهدة علي المصدر السابق ذكرة.
التعليقات